Mani sha shawnglam (Lapu Pan Majan) kaw nna bai du wa ai shaloi, Laiza Muklum mung moi na zawn n nga mat sai. Shara shagu katsi katsang nga nna, masha pyi nau n nga mat ai zawn nga hkam sha nngai. Grau nna gaw Laiza Gat wan hkru mat nna rai sam ai, hpaga ga ai masha ni nau n sa mat sai. Moi ya sha Yin Jang kaw Kanang Nawn kaba byin lai wa ai majaw, masha 20 jan si mat nna, dum nta ni daw aru mat ai majaw, dai shara de sa sa wa wa galaw nga ai lungseng hpaga num/la ni mung yawng gaw Muse hku nna Shweli de she sa sa wa wa galaw sai lam chye lu ai.
Ya ten Myen Hpyen asuya hte anhte KIO/KIA ni a mung masa shagyep shagyeng hkat ai lam a majaw mung majan byin na hkyen hkyen rai taw ai masa rai nga ai. Laiza Muklum ting gaw Shanglawt Hpyen La uniform hkrai hpring mat ai zawn she tai taw nna, moi na zawn Laiza Myo kata de hkawm ai zawn pyi n nga sai. Hpyen Dap kaw sha nga taw ai zawn nga hkam sha nngai. Hpa mi nga nga, Awn hte online kaw hkrum lu na matu, manang wa hpe jahkrum da ai hte maren, dai ni gaw Dai Lawn Rung de jahkring mi gan lung wa nna computer naw ahkrawk yu ra sai. Shawng lam kawn nnan sha du wa ai anhte hpyen hpung ni hpe gaw bat mi ram gaw naw hkring sa na ahkang jaw da ai rai nga ai. Raitim, ra ahkyak wa yang na matu, galoi mung aten tup gaw shajin nna nga ra ga ai. Hpyen Hking hpe n raw shangun ai chyawm gaw ngai na matu manghkang n nga ai, ngu hkam sha lu nngai. Hpa majaw nga yang, ngai nan ndai shawnglawt hpyen hking hpe grai yu ra nna, hpun sharawng dik ai majaw rai nga ai.
Kalang lang manang ni tsun ai, hpyen dap kata kaw rai nna, hpyen hking hpe hpun shaja ai kun ngu yang Myo kata hkawm tim hpyen hking hkrai hkrai nau hpun nna, “kaga labu palawng n lu ndai i” nga san wa ma ai. Dai mung gaw lawm ai, raitim ngai nan hpyen palawng hpun sharawng ai gaw madung rai nga ai. Hpyen du aya dazik hpe chyawm gaw ra ahkyak ai shaloi sha n rai yang galoi n shakap nngai. Dai majaw, Laiza kaw nga taw ai ten ni hta gaw wanglu wanglang nga nna, hpa lit n lu ai zawn nga pyaw dik nga nngai. Grau nna gaw, Awn hte hkrum na ten hpe myit dat shagu, sha ten, yup ra shang ai ten, namdum kaw dung nga ai ten, hka shin ai ten, galoi raitim aten tup hta pyaw dik nga nngai.
****
Facebook account de shang sai......Ngai na account hpe hpaw dat ai hte Awn ngai hpe manang galaw na matu ahkang hpyi da ai (request) hpe mu dat nngai. Lawan ladan di nna, dai hpe shagrin dat ni ai. Dai hpang Awn online kaw du n du sawk tam dat ai shaloi gaw, garai n mu shi ai. Aw...... ndai ten gaw shanhte kaw yup nga ai ten she rai nga ai.
Awn hpe n mu shi ai raitim, shi na account kata de shang nhtawm shi sumla ni hpe langai hpang langai hpaw yu nga nngai.
Ha.............. Awn grau grau she tsawm mat nga ai........ manang ni hte kayet da ai group sumla ni hkan nga yang dan dan dawng dawng nan tsawm taw nga ai le.....
Maigan de nga mat nna rai sam ai.... labu ni mung kadun dun di nna bu da ai majaw, shi a magyi shan ni hpe yu hkrup dat ai shaloi, moi ngai Awn hpe shawng nnan anhte nta kaw na shi a yup gawk kata kaw labu malu nhtawm galeng nga ai shaloi na hpe dum dat nngai.....
Dai shaloi ten ni hta gaw, ndai zawn Awn a magyi shan ni hpe gaw shi hte shana rau yup nna, kajam hkat ai ten hta sha mu lu ai rai nga ai.
Bai nna, hpun da ai palawng ni mung sinda shan nkau mi she dawng hkra rai nna shakra da nga ai gaw...nye salum hpe grai tsang shangun nga sai....moi ngai masawp jum ga ai sinda shan ni hte magyi shan ni wa..... Salum hta n wai ai zawn zawn... kaga la kasha ni dai sumla hpe mu kau ya na tsang ai zawn zawn...ngai chyup ga ai nten hte shabyi shan ni mung yawng yawng hpe mani dan ai zawn zawn.... shi na sumla hkan kaga La kasha ni hte rau kahtep nna kayet da ai hpe mu dat shagu mung kraw kata n chye tsun ai namchyim ni hkam sha nga nngai......
Hpraw nna tu tsawm nga ai Awn a hkum gawng shing yan wa, moi de ngai chyu sha she mu ga, hkra ga, magra ga, chyup ga ai ngu nna sawn da ai wa, ya gaw Mungkan ting na La sha ni yawng yu hkrup na hku she rai mat sai i....... ndai prat na Shihkrawn Ladat (IT) ni wa mau hpa she rai sai.
Awn a sumla shagu hpe mung comments jaw da ai la kasha ni Mungkan ting na she rai nga ai. Jinghpaw hku, English hku, Myen hku.... ........... haaa hkum dik sai...
Dai ten lama mi hpe dum dat nna.. .. shi a ‘Info’ gawk de lawan ladan dip nna shang nhtawm, shi a ‘relationship status’ kaw yu dat nngai....
‘haa........ naw tsamai nga ai.... ‘single’ da...
Awn a gawng shing yan ni mung grau grau nna, sexy byin nna tsawm taw nga ai.... sumla kayet ai style ni mung grau grau nna chye jahtuk wa ai majaw rai sam ai.... hpun da ai labu palawng ni mung grau tsawm ai zawn zawn..... masha she tsawm ai kun... hpun palawng she tsawm ai kun.... Awn a sumla ni langai hpang langai hpe hpaw yu nna, kade lang pyi bai nhtang mat sai pyi n chye sai.... kade yu tim yu n law... Awn hpe hkrai shani tup yu taw ai zawn she ngu nga nngai....
Dai ten.... Dai Lawn Rung gaw Hpyen Rung Daju re ai hte maren... amu grai law ai shara rai nga ai. Aten tup rung sin/dung ai masha nga ai. Ya pyi manang wa na computer kaw jahkring mi gan kajam ya nga ai raitim, shi mung rung bungli naw galaw ra ai majaw, shi hpe bai shara yen ya ra sai.... raitim, ngai na facebook account hpe gaw dai hku hpaw da nna shi makau kaw shi loi mi rau yang rau ai zawn shi Computer hpe gan magra nna, Awn online kaw nga n nga jep yu yu di nngai. Manang wa shinggan gan pru ai ten.... namdum sa ai ten.. jahkring mi phone shaga taw ai ten....Rung laika gan sa ai ten.... lusha lama ma gan sa sha ai ten ni gaw ngai na computer lang ten rai nga ai.... Shaloi gaw manang wa ngai hpe yu nna nga n ngut wa sai....
“Ah Seng... nang nang wa mung dai ram gaw n rai ra na re law.... na Awn gaw galoi mung shana maga she pru wa wa re ai gaw.... anhte kaw shani rai yang, shanhte kaw shana,.. anhte kaw shana maga rai yang, shanhte kaw jahpawt.... nang sawn yu le.... ndai ten gaw shi kaw yup tung ten she re me... gara hku na computer lang na law......”
“re gaw re le... raitim, lama wa.. yup dam dam nna n lu yup ai majaw, computer mi gan lang kun ngu gaw e.....”
“haha.... nang na ana zinli grai sawng mat nga ai......”
“ tsun la u law.... nang zawn re hpyen la nmu.... sumtsaw mung n lu ga, re ai ni gaw kanang chye hkam sha na.....”
“hkau e... ngai mung sumtsaw mi n lu ga tim... num sha gaw chye kajam ai re le....”
“mahkrum madup nga ai ngu deng..”
“she nga law..... nau pyi nga lit.......”
“tsun dan yu le... nang na mahkrum madup langai sha gaw... ngai Mali Panlawng hti shawa hpe loi mi naw garan kachyan dat yu na....”
“ya hpang de le......... nang garai n hkawm shi ai laman lana mi Beer lu nna jahta yu ga le....”
“ngai gaw Beer lu na gumhpraw n nga ai yaw... nang sha n daw yang gaw.....”
“aga... ya nang dan bai nga sai.... ngai gaw gara hku na ndai rung kaw gumhpraw shang na law..... n myit yu ai ga nau hkum shaga yu.....”
“n chye le... Myen Asuya rung hkan na ni gaw ndai zawn rung bungli galaw ai ni gumhpraw grai lu ga ai hpe dum dat nna......”
“haha.... na Nwa Di Myen ni hte gaw hkum shabung le Hkau Seng e...... ngai hpe sha n kam daw nna gaw...”
“kam gaw she kam daw law..........ngai gaw gara kaw na gumhpraw lu na law... nam de she abram hkawm ai kaw nna wa yang me... myit yu le.... Nna Ba sha mi n shagun yang gaw....”
“e le... nye kana ba Awn ngu saga le...shi hpe htet dat na le.....ahhha..”
“gwi kasha... garai pyi nhkau ai kaw nna gumhpraw shawng nyap hkyen sai..... dai gaw tsep kawp hkum galaw re lu.... kade ngat tim ngat u ga.....num ni kaw na gumhpraw htet sha ai baw sha gaw galoi n galaw ai.......”
“majoi shala ai re law... ngai hkau wa e..... ngai gaw nawng e galaw ga ai zawn zawn......”
“ok.... ngai lana mi daw na sha gaw mai byin ai hku nye Boss ni kaw naw hpyi yu na le yaw......”
(bai matut na nngai)
No comments:
Post a Comment