Salum kata na Mayu kasha (1)

Awn.... ngu ai mayu kasha a lam hpe “Mayu Kasha Hpe Dum Shagu” series kaw anhte chye chyalu rai na re ngu kam nngai. Ya gaw, online kaw bai hkan tam nga ding yang hta, Awn hte bai lu hkrum na rai sai.
Myitkyina kaw nna Kampaiti sa lam lapran na Sadung Bum mayan hkan, nanghpam lusha ninghkap masing hte seng nna shawng lam hkawm nga ai ten, n myit mada ai sha Dai Lawn Rung kaw bungli ang ai nye Du manang langai mi ngai hpe Wireless (Walki talki) hte ga shaga wa ai.
“Jaugawng Jaugawng,........... na ai kun........”
“na ai na ai...... gindai.... tsun u......Jaugawng madat nga ai.......”

“nang tam shangun da ai...... samari....... mu tam sai........”
“aw...... re i.......... lawan she tsun u....... ga makoi ni hkum lang nga sa....”
“Facebook kaw Bawk Sha nga ai num langai hte hkrum ai......... shi mying madung gaw Ja Awn nga ai re da...”
“re i.... gara kaw na re da i.........”
“America le.......... nang na Ja Awn mung America kaw nga ai n re i...”
“n re law... ngai tsun mayu ai gaw gara kawn sa wa ai re da i................”
“aw.... dai gaw n san hkrup sai......”
“mana kasha e............. dai ram ram a nya ai gaw..........”
“ngai hpe hkum matsa le......... ngai rai nna she aten la nna tam ya nga yang.......”
“e law e law.. chyeju kaba dik sai yaw....... raitim... lawan naw san dat u........ Myen mung nga ai shaloi gara kaw na sa wa ai......... kadai kasha re.......... ngai hpe chye ai kun?.......... nga ai baw ni le...”
“au law.. mai sa Du wa.......”
“hkum shala taw u..... lawan yaw........... shiga lat taw na.......”
**************
Hpang shani,

“Jaugawng Jaugawng....nga ai i....Gindai shaga nga ai..”
“Jaugawng madat nga ai......”
“aw e.... an hkawng na private signal naw galai kau yu u......”
“ok.......... mai sai kun..... gara hku ta.. lu san sai i........”
“ lu sai... nang na mayu kasha nan re......... nang hpe pyi grai san wa ai.....”
“re i... ha........ngai mung grai marit taw ai ngu n tsun ai i..........”
“she tsun law e......... nang ram ram aput nga ai hpe me.....”
“shi gaw America gara state kaw nga ai da i..........”
“Florida kaw re da..........”
“aw re i.......... aga....... shi sumla mu ai i...”
“mu ai le... shanhte America kaw manau poi galaw ai shaloi kayet da ai sumla ni......... group sumla ni kaw dan dan leng leng tsawm taw nga ai.....”
“ rai na re.... shi gaw laklai hkra tsawm ai re.....”
“moi gade daram tsawm lai wa ai kun gaw n chye ai.... ya gaw ram ram tsawm taw nga ai law Hkau e... ngai pyi shi sumla tsawm nna shala dat ai ngu yang hkrup la dat ai rai nga ai.....”
“hpa majaw mying galai kau ai da i..........”
“aw... dai gaw ndai hku da......... shi gaw Bawk Sha nga ai numsha langai a UN registration kaw bang la dat ai re da... dai majaw lawan wan lu pru mat ai masa le....”
“aw....... ngai na facebook account ma jaw da ya rit yaw...”
“e e... nang galoi hkan lu wa na masa nga ai law.....”
“ndai shata htum yang gaw masha galai na she n rai dawng gaw.....”
“ok.... aw.. shi tsun ai... nau n na yang Miwa hkran hku jahkring mi wa na re da....”
“ha .re i....... aaaaaaaaa rai sai...... atsawm she naw tsun da ya rit... ngai hpe alu sha matut wa na da ngu nna...... ngai na Miwa phone nambat ma jaw da ya yaw....”
“nang wa ai shaloi matut la sanu le..... dai ram ram wa gaw n rai ra na re....”
“n re n re.. grau teng hkra.....she jaw ya rit law... na chye ju hpe galoi n malap na nngai....”
“mai sa law......dai ram ram wa.........”
“Hkau nang n hkrup sha yu nna n chye shi nga ai...haha...”
“ngai mung sumtsaw sha gaw lu ga ai re le... nang ram wa gaw n rai ra ai...”
“ngai na gaw sumtsaw n re... tsawra tsawra....salum kata na mayu kasha....”
“rai sai rai sai....... yaw...pat sai...” click.

Nye salum ni majoi she gumhtawn nga sai... shi hte lu hkrum taw gaw....... moi na hte maren sha sai lam ni rawt wa nga ai..... grau nna gaw salum kata na sai ni prut taw nga sai Awn e..... (bai matut na nngai)