Hpang na shata kawn gaw Shang Lawt Asuya ni Mali Hka Wanjak kaw nna Myihprap wan jaw sana re nga shiga gaw mare ting kadu wa sai. Anhte prat hta mihprap wan ngu ai gaw lanam ta kalang manang chyinghkrang jak kaw nna jaw ai sha hkam la ga yu ai. Shani shana wan lu wa sana re nga ai shaloi gaw, madang tsaw wa ai kun, hpa ni wa galaw ra na kun, myit ung ang nga ga ai.
Aw.. rai sa, Maigan de nga ai Hpu hpe Computer naw mari shangun na re. Nye Hpu gaw Japan Mungdan kaw bungli sa galaw nna dinghku hpe mung maga mi hku madi shadaw nga ai rai nga ai. Nta kaw grai wa yak hkak ai lam gaw n nga tim, ngai zawn re ai prat dep shabrang langai a matu madang dep arung arai ni mari na rai yang, Nu yen Wa hpe tsun la na yak nga ai. Raitim, nye hpu hpe tsun yang gaw chye na loi ai hta n-ga, grai mung tsawra ai majaw galoi n ningdang ga yu ai. Tsun shagu jaw ai daram rai nga ai. Ngai mung ra ai hta jan nna galoi n hpyi ga yu ai.
Mihprap wan ngu yang she, Ja Awn lang ai hpayawngteng wan she bai dum wa sai. Hpayawngteng wan hpe she marit ai zawn zawn.. ha... nye masin salum ni gara hku wa byin nga sai kun....
.......................................
“... Ma Seng e.. nang na gaw Wan lu na gaw teng a ni e...... maning kawn lu na re ... lu na re.. nga nna ya du hkra n lu ai n rai i?...”
“ maning gaw Taimu wa dingsang pat da ya ai re da.... ya dai ning gaw.. Chyinghkrang wan mung Hka Mawru kaw lawm mat sai gaw.. dai majaw shanhte hpyendap kaw mung Wan ahkyak sai majaw hpaw ya ai rai na re....”
“aw.. chyinghkrang wanjak hpe dingsang Karai Kasang htawng kalang kau ai she rai na sai...... shing mi she n rai yang gaw ya pyi wan lu na masa n nga ai gaw i.... e mari jaw na... atsawm lang yaw.. maru marang re ai baw sumla ni hkrai hkum hpaw kajam re lu.... ”
“....e law.. hpu...... mai sa.. chyeju kaba yaw.... bye bye”
Myit su na matu Hpu a numhtet numra ga ni hkam la ngut ai hte Computer nnan lu wa na re majaw myit pyaw dik mat sai.
Miwa phone nga ai majaw mung anhte Myitkyina Bu ni gaw Maigan de matut mahkai grai loi mat sai. Moi de gaw Yangon de phone lu shaga na pyi yak ai ten ni mung nga lai wa yu sai... Maigan de nga ai ni a lam chye mayu yang Yangon kaw nga ai ni hpe san la ra ai. Ya gaw Yangon na ni she Myitkyina ni hpang de san wa masai. Ya mung nye Hpu hte jahkring laman computer lam jahta byin mat sai. Mari jaw na da... .. Hpang na shata Mihprap wan lu ai hte hkrak computer mung lu, aw.. prat madang ngu ai baw wa kun, tsin yam ngu ai baw wa kun... n chye tsun sai... masha amyu ni lang ai pyi grai na ai hpang she anhte ni lang lu ai hku she rai sai gaw i.... gawk kata kaw ngai yu ra ai baw sumla hkrung ni lu yu na re majaw mung tau hkrau pyaw nga nngai...
.......................................
shana maga shat sha ten...
Nu a lecture
“Ma Seng, ... nang nang mung nhpu Computer shagun ya ai kaw nna gawk kata chyu rawng mat reng ai le....”
“oi Nu... computer kayet sharin nga ai re Nu... kalang mung n sharin ga yu ai majaw aten grai la ra ai le....”
Hkrak nga yang ... ngai manang ni kaw galoi mung sa lang nna Computer gaw nye matu alak mi tsasam gaw n rai nga ai.. gawk kata kaw shakrin sumla ni hpaw yu ai lam ni,... num/la kajam hkat ai sumla (blue picture) ni yu ai she Nu chye yang gaw ..........
“aw... grai yak ai baw wa i....”
“ya na computer ni gaw nau gaw n yak ai law........ English laika loi li chye hti yang chye lang sai...”
“dai hku nga yang Nnam Ja Awn hpe mung sharin ya u le....”
“aw... she mai law Nu... dai ram sha gaw minor re........”
“hpa baw minor mi..... Minor ngu ai hpaji mung nga ai ngu....”
“aw.. n re... Ja Awn hpe sharin ya na ram sha gaw chye ai, ngu tsun mayu ai ga....”
N dum kau nga ai... mi kaw nna dum ra ai re wa... hkrak rai sai.. computer sharin na matu nye gawk kata Ja Awn shang wa na hpe tau hkrau myit yu nna pyaw nga nngai.....
“galoi sharin hpang mayu ai rai? Awn”
Ja Awn hpe ading tawk san dat ni ai... ngai nau myit rawt ai majaw Nu mau mat na tsang ai majaw, loi mi sari lang ai hku nna, kam n kam re ai masa hku san dat ai lam rai sai..
“Agu rau ai shaloi le...”
“aw... mai ai le.... ngai rau ai shaloi shaga dat dat di na yaw...”
........................................................
Um... dai ni gaw Jawng pat nhtoi re majaw, Awn hpe nta sin da shangun nna, Nu hte nta masha nkau ni gat mari sa mat sai... Ngai chyu sha she jan law hkra yup taw nna kadai hpe pyi n dep kau dat nga ai.....
“Agu.. shat sha sana i”
“aw... e e” Hka shin hpa jet hte hkashin gawk kawn pru wa ai ngai hpe Awn mu nna san dat ai
rai nga ai...
“hkyen da sana yaw...”
“mai sa... labu palawng galai la ngut yang pru wa na”
..................................................
“Awn shadu ai i... ndai shat mai ni gaw...”
“nkau gaw Amoi shadu na matu lajang da ya ai....Awn gaw wan kaw shadun ai sha re...”
“aw... mu nga ai le...nang na lata hkang lawm sai ga rai nga ai le.. he he..”
“Awn hpe Computer galoi sharin ya na mi...”
“aw.. e e... dai ni sharin ga le... nang rau ai n re i”
“rau ai le.. dai ni gaw shani tup nta sha nga ra na hku rai sai... Amoi tsun yang shi sa ra
ai shara grai law ai da....”
Ara rai sa... dai ni gaw ahkaw ahkang kaba wa n rai ni....
(bai matut na nngai...............)
No comments:
Post a Comment