Ha... ngut sai.... Ahdwi na maumwi mung n ngut hkraw... baw chyu mahkyit nna madat nga nngai... kalang lang shi tsun ai n madat ya na tsang nna, ngai hpe lata hte achyaw la nhtawm tsun shaja nga ai ahdwi hpe ninghkap mung n gwi rai nna, madat taw nga nngai. Ndai maumwi ni gaw ngai kaji ten kaw nna Ahdwi a shama kaw ba let madat ga yu ai maumwi ni sha gaw rai nga ai. Moi de anhte jiwoi ji wa ni gaw laika sharin jawng n nga ai re majaw, ma kaji ni hpe asak kaba sai ni gaw, ndai zawn maumwi mausa ni hkai dan let, hpaji jaw ga, arawn alai hte seng ai lam ni hpe sharin ya ai rai nga ai. Dai mung anhte amyu sha ni ya du hkra asak kaba sai ni hpe kam ai myit masa npawt rai nga mali ai. Anhte Jinghpaw Wunpawng amyu sha ni a dakkasu ngu nna tsun tim n shut nga ai.
Raitim, Ahdwi hpe gaw galoi mung tsawra hkungga ai wa re majaw, shi hpe lale nna hpa mung n galaw gwi nngai. Dai majaw mung ngai hpe grai tsawra ai rai nga ai. Ngai hpe hkrum lu na matu Ahdwi kade ram she lat kau sai ngu ai hpe ngai hkam sha lu nngai. Asak kaba ai ni a hkam sha ai lam mung dai ni na anhte Ramma ni gaw malap mali rai nna nga shalai kau ai aten ni kade she law sai pyi n dum na sai.....
Nta masha ni gaw yawng tinang gawk de tinang shang yup ma sai.... Awn mung mi me jau jau npu htap de yu mat sai.... jahkring hkring laika hti ai nsen ni loi li ngoi pru wa ai hpe na lu nngai.. .. raitim, Awn a nsen zim mat ai grai na sai... ngai hpe mi lat nga sana kun?.... mi yup mat sai kun..... ngai chyu sha ahdwi a makau kaw galeng let, shi dung jahta dan ai hpe sha madat masu su nna nga taw nngai. Nye myit ni gaw dai na yuptung hkying 12 du na hpe sha jahkring hkring maja let... .. nta shakum kumba kaw shakap da ai Nayi dingsa kaw sha jahkring hkring chyan mada yu yu rai let, myit ba nga nngai..... kalang lang gaw dai ni Awn hte ahpum hkat ai ten ni... Awn hpe hkrum katut lai wa ai lam ni hpe myit dum dat let.... salum kata sai lam ni shamu nga ai mung Ahdwi pyi na kaja ai she rai yang gaw na na sai.... .. hkying 12 du wa sai.... gara hku di na i.....
Ummm.... hpa mi nga nga tsun ra sai.......
“Ahdwi .... Ma Seng hpawt de jawng naw sa ra ai... yup sana yaw.... grai yup mayu wa sai.....”
“aw... grai naw jau ai n re i...”
“n jau sai le Ahdwi... yuptung pyi jan wa sai gaw.......”
“aw... e e...... hpawt na hkan bai lung wa yaw.... Ahdwi jahta dan na grai naw nga ai......”
“ e law... rau yang lung wa na yaw Ahdwi...”
“nye kashu gaw myit su ai she ngu.....”
“umm law.. Ahdwi... atsawm yup yaw.....a lu ai shana rai u ga......”
Ahdwi hpe lawan wan shakram da nna, npu de lawan wan lagat yu mat wa sai.....
Gawk kata de shang wa nna, Wan pyi n hpaw rau sai sha nsin kata kaw abram nna, nye lapu palawng ni galai kau sai... kata labu kasha hpe mung raw kau let.. ... shana yup yang hpun ai baw labu, palawng ni sha abram hpun la nhtawm gau ngwi sha lanyan pru wa sai......
Shinggan hkan na wan ni mung yawng sat kau nna.... nsin chyip nga ai kata kaw Awn yup nga ai gawk maga de lanyan sa wa sai..... gawk makau kaw du magang nye masin salum ni mung majoi she htuk htak nna gahpra dik nga ai... Awn a gawk makau chyinghka makau kaw tsap dat ai hte.... Awn a hkum sama hpe marawt dat lu ai zawn zawn nga hkam sha nngai.... hkum ting katsi mat ai zawn zawn... ... nshung si ni mung majoi she marawng pru wa reng sai........
Awn a gawk chyinghka hpe gau ngwi sha kanawng dat ai shaloi gaw... ja ja nga... hpa mung n shamu..... ha... gawk chyinghka hkindang pat da sam sai...... gara hku di na i.... hpa majaw i... ngai tsun ai hpe shi n na kau ai kun........ shaga yu na re..... nau shaja shaga yang mung ntsa htap kaw yup nga ai nta masha ni dum na mung tsang........
“Awn.... Awn..... shist... shist....”
Kya dik ai nsen hte shaga dat ai........ hpa nga mung n htan wa........
“Awn... Awn...Awn..... Gu re law....”
Ha.... n dum sam ai...... gara hku wa di sana kun.......
“kawk kawk.... kawk kawk kawk......”
Dai shaloi she ntsa htap kaw na Nu a nsen...
“hey... gadai wa ta... yup tung yup hkawng e wa me chyinghka hkan akawk nga ai gaw.......”
Ha.... ngut sai... baw ting hprim she nga mat reng sai............
“aw... Nu, ngai re law... Ma Seng re..........Wang chyinghka zaw gaw hkat sai kun ngu san na ngu nna Awn hpe sharawt ai re....’’
sha ngu kau dat ni ai.....
Nu mung hpa bai n htan sai majaw.. ngai mung bai n kahtap tsun sai........
Kaning n chye di sai.... nye gawk de she bai wa sana re.......
Gawk de du wa nna, grai myit n gut ai hte.... jahkring mi tsap nga let... myit taw nga nngai..... ngai myit mada da ai lam ni yawng n byin mat sai.... ngai shingran da ai lam ni wa kaman rai sam sai........ Awn hpe mung n ju mat ai zawn zawn nga let.... salum kata kaw mung machyi nga nngai.....
N rai na re.... shada chye na shut ai she rai na re...... ngai tsun ai shi atsawm n na kau ai she rai na re..... ngu bai myit la let... nye salum hpe shanem la nga nngai...... rai sanu ga.... aten grai naw nga ai she re gaw.... shi hpe ngai kaja nan tsawra ai she re gaw..... nye tsawra myit ajet a majaw shi ngai hpe lani mi lu hkap la na re..... ngai kam ai........
Myit htum let... yupku hpe abram tam la nna.... kaleng dat let, nba hpun kaba hpe ahpum da nngai... nshungta du wa mahka November shata praw rai wa sai re majaw, nshung sama ni mung wai wai nga let..... yuptung rai wa yang kashung la nga ai.... Dai majaw nye nba hpun kaba hpe shaw da ai masum ya ram rai sai......
nba hpun kaba hpe karawt la let... hpun dat ai shaloi..... n myit mada ai...
“wek.... hpa wa ta?....” alum nga ai hkum hkrang langai hpe magra hkrup dat nna grai kajawng kau ni ai.........
Makau kaw nga ai dat mi masawp la nna nan dat ai shaloi gaw...
Ha........ AWN...... AWN.......gara hku na ndai kaw..........
(bai matut na nngai)
No comments:
Post a Comment