Ya hte tup Myen Sawa ni hte ginrang hkat nna aten n lu mat ai raitim, Mali Panlawng hti shawa manaw manang ni hpe matut tsun dan mayu ai mau byin naw ngam taw ai hpe gaw galoi mung dum nga nngai. USA, Thai, Malaysia, Japan, Singapore, Myanmar, India, China, shara shagu hkan na ni, sa tam gawm taw taw re ai hpe mu hkrup nna, grai myit n pyaw ai hte, laksan aten la nhtawm, ndai mau byin hpe bai matut dat nngai re.
****
Manang wa AhDi tsun ai mau byin bai matut.....
Dai zawn, Ahling hte Mawdaw rau jawn hkrup ai kaw nna, Mawdaw hkring taw ai ten ni hta raitim, shi hte ngai galoi mung rau sha tsap, rau sha hkawm, rau shaga rai nna, grai hkau mat saga ai. Kaja nan shi gaw manang n lu ai she rai nga ai. Ya du hkra shi hkau ai manang ajet ngu na langai mung shi makau kaw n sa wa ai hpe yu yang, shi manang ajet ni n hkan byin mat ai gaw teng nga sai. Majoi na chye hkat ai manang ni sha lawm nga ai. Dai majaw mung nye makau kaw shi hkan tsap nang nga ai hpe maram yu lu nngai. Anhte Laiza manau pa kaw jahkring mi hkring sa ga ai... Shaloi mung shi hte ngai rau sha rai nga ai.... Matut nna Lung Chuan de lai na matu Miwa hkran de rap nhtawm, Miwa hkran maga na tau la ai mawdaw hpung ni a makau kaw yawng tsap marawng let, woi awn ai ningbaw ningla ni hpe lat taw ai ten....
Mawdaw nang ai ni galoi mung mari sha ga ai Tsi ni mung makau kaw na tsi seng ni gaw laksan dut ya ai rai nga ai... dai tsi seng de tsi mari na matu dum dat nna, shi hpe mung woi sa sai.. tsi ni mari la da nna... tsap dingda taw nga yang....ya she shachyen shaga na matu dum dat nngai....
“Ah Ling... an hkawng gaw garai n shachyen shi ai le i.....”
“e re........ Ah Ling na kawa gaw Sam le... Ah Nu chyawm gaw Jinghpaw re.... Lahpai Nang Doi da... Manmaw NatGyiKone kaw na le...”
“aw re i.. dai majaw she tsawm taw nga ai gaw... Sam hte Jinghpaw kayau nna....”
“n rai na re law.. AhLing gaw n tsawm ai......... AhDi nang gaw deng?..........”
“um.... anhte gaw Hkahku Mung na ngu ga le..... Lung Sha Yang kaw na re... amyu gaw Nlam ni re....”
“Ah Ling hte gaw hpa daw na rai deng?....”
“ummm.. Sam ni hte rai yang gaw shawng jin shawng la she n rai i........ hhehe..”
“n re le... Ah Ling na Kawa gaw Sam re nga tim Jinghpaw amyu mying shamying la ai she re me..... Maran Naw Di nga nna shamying la ai re le.. dai majaw Ah Ling hpe gaw Maran kasha hku sha chye ma ai.....”
“aw ... rai sa.. nye mying hte kanoi she bung taw nga ai le.... shaloi gaw Mayu kasha nan rai sai....”
“ re ngu... hkum masu yaw....... num shagu hpe mayu shatai ai zai ladat ni grai hkrit ra ai...”
“n re law... teng sha tsun na... Maran ni hpe gaw anhte Nlam, Wa Na, Tangbau Tangla nga ai ni a tara shang labau ngang ai mayu dingsa ni nan rai sa.....”
“aw re i.. e le... kagu ang ai mung hkrak ai le.... Kanam hpe atsawm lam woi re lu yaw AhGu... hahahah.....”
Shala nawng e shi tsun dat ai ga si ni wa, nye kraw kata kaw kaja nan htuk htak mat reng ni ai.......
“nau pyi she kam lakawn gaw e.. ngai nam e..... Gu hku nna ra n rawng, myit lawm, Hkum lawm gawn lajang na le yaw....”
“myit lawm yang rai sai law... hkum gaw n lawm ra sai..... hkrit ai...”
“hpa hpe hkrit ai mi...... ngai na hkum kaw hkrit hpa rung mung n tu ai... lata lamin pyi yawng zen da sai.. ngai Nam hpe machyi shangun na baw hpa nan n nga ai... ya nga taw ai hkum ting gaw shangwi shapyaw ai baw sha ngam sai.....”
“iiiiiii .. dai zawn re hkum hpe grau hkrit ai.... hahaha...”
Anhkawng hkrai n dum n dam nga nna jahta taw ai hpe makau kaw na manang ni na hkrup nna, nkau ni gaw anhkawng hpang maga man yawng madat lawm wa ai majaw.. kaya ya nga nna shazim kau saga ai...bai nna, kaga shara mi de she bai htawt mat saga ai..... nau n na yang....
“gai gai gai... shara bai la saga... Mawdaw rawt sana re....”
shaloi ngai mung lawan ladan mawdaw ntsa de lagat lung wa nna, shara langai hpe dung da nna, kaga shara langai mi hpe shajan maga da ni ai.....
Nau n na ai ten shi bai hkan lung wa sai..... ngai na makau hta lai nna kaga shara mung n man sai hte maren, akatsi sha nye makau kaw sa dung nu ai..... bai nna, chyeju dum ai ga hkaw mi mung n tsun ai sha .. kaya ai miman hte... ngai hpe kalang lang lagu yu nga ai.. shi a matu laksan galaw da ya ai shara re ai hpe mung tau hkrau nna chye taw sam ai.... dai hku rai nna, mawdaw hpung ting Miwa ga YinJang mare de rawt sa wa saga ai.... Laiza hte Yinjang lapran na Lam hpunggaw ni hta malawng maga gaw madawn ai hte baw sin ai hte rai nna, nkau ni gaw tau hkrau tsi ni mari sha da ai raitim, n dang hkam na daram bawsin mat ai ni lawm nga ga ai. AhLing chyawm gaw tsi sha da nna grai wa bawsin ai gaw n rai tim, shi mung n dum n dam rai nna, ngai na lahpa ntsa kaw bai shara la da magang sai....
Shaloi she.......
“ baw bai sin wa ai i.......”
“rai sam ai... kraw galau ai zawn mung nga ai...........”
“lam hpunggaw nau law nna rai na re........yet hkring rai yang Bum ntsa kaw grau katsi wa ai re lu.....”
“re i.... Ah Ling hkrit wa sai......”
“n tsang ra ai... ngai na makau kaw shamyet taw u.....”
“umm....”
Shi shamyet taw ai ten... mi shawng na zawn.... baw hkan bai manat ya ni ai....... ndai lang gaw grau grau nna shi hpe masawp ai shaloi gwi wa ai hpe maram lu nngai...... shi mung shawng na hta ngai hte kahtep ai hta grai wa myit agam ai masa ni n nga wa sai hpe maram lu nngai.....
Kalang lang shi du krung ni hkan masawp ya ai.......... shi lata ni hpe manat ya ai.... hkum lahpa lasa ni hpe manat ya ai.... dai hku rai nna, an hkawng a hkuhkau ai lam gaw grau grau nna magyep kap mat ai ngu nna sawn la lu nngai....
Shi mung kalang lang ngai na lata layung ni hpe bai manat taw nga ai hpe n dum shami hkam sha lu nngai.....
Dai hku manat hkat nna Lung Chuan de du mat saga ai.....
Shana hkan manau poi hkan kawan hkawm ai ten ni hta AhLing hte an hkawng gaw rau rau sha hkawm byin ga ai.... lana mi na hta...
Lung Chuan Manau pa makau kaw e... tsit lali tsawm ai nam maling hte hka nawng kaba ni mung nga ai rai nga ai..... kalang lang nye myit hta lagu myit ai gaw.. dai nam maling kata kaw sa rawng taw na matu rai nga ai.... dai majaw ahkaw ahkang hpe lat nawng e... lana mi na ten... anhte manam ni hpe Lung Chuan Manau Poi hta na Yungwi Pinra hte Kamung Naura (concert) kaba madun ai shana e.... AhLing hpe saw la ni ai.. Manang ni yawng dai madun poi kaba kaw myit shang sha nga ai ten... AhLing hpe shingdu hku shi lata kaw dun la nna....
“AhLing... saw an hkawng sha wam hkawm mat ga... Poi wang kata hkan lusha ni grai dut ai... masha nau law nna hkawm yang grai shuk ai.....”
“e re i... saw...”
Nga nna shi mung hkrawn sha nga nna an hkawng hkrai pru hkawm mat saga ai......
Dai hku rai nna, shi hte rau hkawm chyai nawng shi lata hpe jum let dun da tim, shi mung kaga mi ningdang ai lam n nga sai majaw.... shi hpe lusha sha hpa amyu myu mung mari jaw nngai... shi hte mani tsun shaga ai lam yawng mung kaja nan grai pyaw ga ai...... shana tup hkawm chyai ai hpang, anhte manam ai shara de garai n wa shi yang,
“AhLing shana tup hkawm da nna grai ba reng ni ai... anhte hkring ai shara de wa na Bus ni mung n nga sadawng gaw.... Hka nawng makau kaw jahkring mi sa hkring la ga le....”
“re i... mai ai le... AhLing pyi ndai Hka Nawng hpe grai tsawm dum ai rai sa.....”
“saw.. htaw ra maga maling maga hku sa ga... ndai maga Miwa ni nau garu ai...”
“ok.....”
Dai hku rai nna, nam maling hpe lai di let.... simsa dik ai shara hka nawng makau kaw sa hkring nga saga ai......
.........................
(bai matut na nngai)
No comments:
Post a Comment